年底心情紀錄

客語原文   

     2022年，大家過到好無?今年也共樣發生當多事情，有歡喜个，有傷心个，有幸運个，也有痛苦个。不管過到好也係壞，還係要摎2022年「掰掰」，迎接新个一年，2023年。

    𠊎在這年也發生當多事情，從年初開始代理主管，到年中个時節工作个業務忽然間增加非常多，無日無夜在該拚，無安無樂，到10月又再過代理主管，在工作上做得講係非常沒閒的一年。

    毋過，在這年，𠊎也重新學習客語，報名10月初1第一擺舉辦个客語能力認證-高級。從7月報名，7月底收到教材，8月、9月準備，一直到10月考試，真正也學到儘多平常沒無看過也無聽過个詞彙，摎考初級、中級、中高級該下，完全毋係共隻等級。考試該下正發現，原來𠊎還有當多有不足个地方，包括師傅話、客家語別隻腔調个學習，但係不管最後有通過無，這確實也係𠊎人生中無共樣个一段。

    另外，還有一隻當特別个經驗係，𠊎報名參加客家委會會招募「建置臺灣客語語音資料庫」發音員，順利錄取。錄音个時節也分客語先生安腦講𠊎當會講客，認得到已多客家字，兩擺个錄音當中發現，原來共樣係客家話海陸腔，生活在無共樣个位所，海陸腔个發音也多少會有所爭差，這也引起𠊎繼續學習客語个動力。

    還有，𠊎也在今年个最尾一日，決定愛來寫部落格，毋管有人看也係沒人看，繼續寫，繼續記錄能𠊎學習客語、準備客語認證个腳跡，也希望各位前輩做得多多包容錯誤，多多指教。

    新个一年會過到仰般?麼人也說毋準。不管新个一年係風，係雨，係出日頭，也係發風搓，保持好心情，把扼當下个每一日，每一分，每一秒鐘，珍惜(亻恩)俚愛个人，做好自家本分斯係差毋多了。新年會到了，你準備好了吂?😊

-------------------------------------------------------------------------------

國語翻譯

    2022年，大家過得好嗎?今年也發生很多事情，有歡笑，有傷心、有幸運，也有痛苦。不管過得好不好，還是要跟2022年說「掰掰」，迎接新的2023年。

    我在這年也發生很多事情，從年初代理主管，到年中時業務量忽然增加，沒日沒夜在拚，心神不寧，到了10月又再次代理主管，在工作上可以說是非常忙碌的一年。

    不過，在這一年，我也重新學習客語，報名10月1日第一次舉辦的客語能力認證-高級。從7月報名，7月底收到教材，8、9月準備，到10月考試，真的也學到很多平常沒有看過也沒聽過的詞彙，跟考初級、中級、中高級的時候，完全不同等級。考試那時候才發現，原來我還有很多不足的地方，包括客家諺語、客語其他腔調的學習，但是不管最後有沒有通過，這也確實是我人生中不一樣的一段。

    另外，還有一個很特別的經驗是我報名參加客家委會會招募「建置臺灣客語語音資料庫」發音員，順利錄取。而錄音的時候也被客語老師稱讚我很會說客語，認得出很多客家字，兩次的錄音中發現，原來同樣是客家話海陸腔，生活在不同的地方，海陸腔的發音也會有所差異，這也引起我繼續學習客語的動力。

        還有，我在今年的最後一天，決定要來寫部落格，不管有沒有人看，繼續寫，繼續記錄著我學習客語，準備客語認證的足跡，也希望各位前輩可以多多包容，多多指教。

        新的一年會過得怎樣?沒人說得準。不管新的一年是風，是雨，是晴天，還是颱風天，保持好心情，把握當下的每一天，每一分，每一秒，珍惜我們愛的人，做好自己的本分就差不多了。新年快到了，你準備好了嗎?😊